कृष्णपुर नगरपालिका–१ निगालीमा रहेको विशाल सामुदायिक वन उपभोक्ता समितिका पदाधिकारीले अवैध रुपमा कटानी गरेको आठ थान सालको गोलिया आज बरामद गरिएको छ ।
वाणी सब–डिभिजन कार्यालयबाट खटिएर गएको वन अधिकृतसहितको टोलीले अवैध रुपमा कटानी गरी लुकाई छिपाई राखेको ७२ दशमलव ५२ क्युविक फुट सालको गोलिया बरामद गरेको हो । अवैध रुपमा काठ कटानी गर्ने कार्यमा संलग्न सामुदायिक वन उपभोक्ता समूहका सहसचिव रमेशबहादुर बुढा र अनुगमन समितिका संयोजक धनबहादुर ठकुल्ला फरार छन् ।
फरार रहेका दुवै जनाको खोजी भइरहेको वाणी सब–डिभिजन कार्यालयका प्रमुख विश्वराज पण्डितले बताउनुभयो । वनका सुरक्षाकर्मीले अवैध रुपमा काठ कटानी भएको जानकारी पाएपछि बुझ्न जाने क्रममा जेठ ३२ गते वनरक्षक जोखनलाल गडरियामाथि साङ्घातिक हमलासमेत भएको छ ।
अवैध काठ कटानीमा संलग्न दुवै जनाले गडरियामाथि हमला गर्दा उहाँको करङ भाँचिएको छ । उपचारका लागि उहाँलाई कैलालीको अत्तरियामा रहेको पद्मा अस्पतालमा उपचारार्थ भर्ना गरिएको छ । डिभिजन वन कार्यालयका प्रमुख अजयविक्रम मानन्धरले समेत प्रेस विज्ञप्ति जारी गर्दै कर्तव्यपालनको सिलसिलामा खटिएका वनरक्षकमाथि हमला गर्नेमाथि कानूनी कार्वाही गर्न माग गर्नुभएको छ ।