सकारात्मक परिवर्तन

सकारात्मक परिवर्तन


Latest Nepal News - The Times Of Nepal provides latest news from Nepal and the world. Get all exclusive Breaking News Nepal, current headlines, live news, including hot topics, latest breaking news on business, sports, world and entertainment.

सकारात्मक परिवर्तन सबैले चाहेको र खोजेको हुन्छ तर बाटो नदेखेपछि मान्छे अल्मलिन्छ । फेरि बाटो फेला पारिहाले पनि व्यवहारिक रुपमा नै सकारात्मक परिवर्तन ल्याउन भने जति सजिलै सोचिन्छ त्यति सजिलो हुन्न । सही दिशा
निर्देशन, दृढ संकल्प र अटुट अभ्यासले मात्र सकारात्मक परिवर्तन हात लाग्न पुग्छ ।

हामी कसलाई, कहिले र केलाई परिवर्तन गर्न चाहन्छौ ? भन्ने विषयमा हामी प्रष्ट हुन जरुरी छ । स्पष्ट रुपमा भन्नु पर्दा हामी हामीलाई परिवर्तन गर्न चाहन्छौ, कहिले भन्दा अहिले नै हामी जहाँ छाँै त्यहीबाट परिवर्तन हुन चाहन्छौँ र हामी
केलाई परिवर्तन गर्न चाहन्छौं भने हामीमा भएका खराबीलाई । हाम्रा खराबीलाई हटाएर असलपनाको स्थापना गर्नु नै सकारात्मक परिवर्तन हो ।

Advertisement

सकारात्मक परिवर्तनका लागि मैले कसलाई कुरे भन्दा मलाई र तपाईले कसलाई आजसम्म कुर्नुभो भन्दा तपाईलाई । स्पष्ट छ – हामी नउठेसम्म र नजागेसम्म केही हुनेवाला छैन । आफ्नो काम आफै गरेर, श्रम गरेर पैसा कमाएर स्वच्छ रुपले बाँच्न नजानेसम्म, हामीले खोजे जस्तो र सोचेजस्तो परिवर्तन आउँदैन किन कि पसिना बगाउन थाले पछि रगत बगाउन बन्द हुन्छ र विशिष्ट समझदारीको विकासले चेतनामा आउने समुन्नत क्रान्ति चेतले सकारात्मक परिवर्तनको बाटोमा हिड्न र हिडाउन सबैलाई उत्प्रेरित गर्दछ । सकारात्मक कर्मको बाटो शान्तिपूर्ण, सृजनात्मक र अग्रगामी हुने गर्दछ । अझ गहिराइमा र उचाईमा पुगेर भन्नुपर्दा मान्छेले आफूलाई चिनेर आफू हिँड्ने बाटो देखेर राम्रोसँग हिँड्नु नै
सकारात्मक परिवर्तन सफल हुनु हो । सकारात्मक परिवर्तनको लागि आन्दोलन भनेर चिच्याउने तर सकारात्मक परिवर्तन नल्याउने अनि विकास नगर्ने दृष्टिविहीन व्यक्तिहरूको आन्दोलन अन्ततः असफलता, असन्तुलनता, वेथिति र विकृतिमा पुगेर टुङ्गिन्छ जुन घातक र दुःखदायी हुन्छ । आन्दोलनले सही दिशा र गन्तव्य पाएन र खोजिएको परिवर्तन भएन भने मान्छे नकारात्मक हुन्छ र उसमा आक्रोश र घृणाको बादल मडारिरहन्छ । फलतः विकास होइन विनाश हात लाग्छ र निराश भएर आकाशतिर हेर्नुपर्ने हुन्छ ।

रत्नाकार डाँकु वाल्मीकि ऋषि बन्नु र राजकुमार सिद्धार्थ गौतम बुद्ध बन्नु आदि सकारात्मक परिवर्तनका ज्वलन्त उदाहरणहरु हुन् । यही सही दिशानिर्देशन र गन्तव्य प्राप्तिले सफलता हात लागेको र खुशी एवम्उ त्साहको बहार आएको हो । त्यसैले आफूले आफूलाई नचिनेसम्म आफू वरिपरि होस् या अन्य ठाउँ, समाज र राष्ट्रका मान्छेहरु जे जे गुण र कारणले विकसित र सकारात्मक बन्न सफल भएका छन् ती गुणहरूलाई आफ्नो वस्तुस्थिति अनुकूल ढालेर आफू सकारात्मक परिवर्तनको बाटोमा हिँड्न सकिन्छ ।

सकारात्मक परिवर्तन आउनु भनेको खराब सोचाइमा असल सोचाइ आउनु, खराब भावनाको ठाउँमा असल भावना आउनु, गलत कामको ठाउँमा असल काममा लाग्नु हो । कर्तव्यच्यूत र जिम्मेवारविहीन हुन छाडेर कर्तव्यवान् र जिम्मेवार बन्नु, भ्रष्ट हुन छोड्नु, मिसावट गरेर सामान बेच्न छोड्नु, झूट बोल्न छोड्नु आदि सकारात्मक परिवर्तनमुखी उपलब्धिहरू हुन ।

सारमा भन्नुपर्दा आफू बसेको ठाउँलाई मस्तिष्क, हृदय र कर्मशील हातखुट्टाले सुन्दर बनाउनु सकारात्मक परिवर्तन हो । कलह युगलाई शान्त युग बनाउनु सकारात्मक परिवर्तन हो । बन्धनबाट मुक्तीमा पुग्नु सकारात्मक परिवर्तन हो । सकारात्मक परिवर्तनले ल्याउने आनन्द कल्पना गरेर र लेखेर नसकिने हुन्छ । अन्ततः सुख, शान्ति र आनन्द प्राप्त गर्नु सकारात्मक परिवर्तनको मिठो फल खानु हो ।

-राजेन्द्रप्रसाद न्यौपाने

तपाईको प्रतिक्रिया दिनुहोस्

सम्बन्धित पोस्टहरू

भिडियो

छुट्यो कि?