स्वागतम्,
Friday 29th March 2024   |   Switch to English
Times of Nepal

राससले समयसापेक्ष आफूलाई परिवर्तन गर्नुपर्छ : मुख्यमन्त्री राउत

प्रदेश -२ मुख्यमन्त्री लालबाबु राउत - The Times Of Nepal
सेयर गर्नुहोस

७ फागुन : प्रदेश नं २ का मुख्यमन्त्री लालबाबु राउतले राससले समयसापेक्ष आफूलाई परिवर्तन गर्नुपर्ने बताउनुभएको छ ।

राष्ट्रिय समाचार समिति (रासस) को ५९ औँ वार्षिकोत्सवको अवसरमा रासस प्रदेश नं.२ कार्यालयद्वारा आज जनकपुरस्थित नेपाल पत्रकार महासङ्घको कार्यालयमा आयोजित कार्यक्रममा उहाँले राज्यको आधिकारिक धारणा सार्वजानिक गर्ने सरकारी मिडियाको रुपमा रहेको राससले बदलिँदो परिस्थितमा आफूलाई पनि परिवर्तन गर्नुपर्ने बताउनुभएको हो ।

मुख्यमन्त्री राउतले राज्यको मात्र धारणा सार्वजनिक गर्ने मिडियाको रुपमा परिचित राससले सबैको भावनालाई समेट्नुपर्ने उल्लेख गर्दै सरकारको सफलता र असफलतामा मिडियाको भूमिका अहम हुने भएकाले सरकारको सकारात्मक कामलाई जनतामा लैजानु र गलत कामको आलोचनात्मक टिप्पणी गर्नु मिडियोको धर्म भएको बताउनुभयो ।

सङ्घीयतालाई मजबुत बनाउन राससले स्वतन्त्र, निष्पक्ष एवं सत्यतथ्य समाचार सम्प्रेषण गर्नुपर्नेमा जोड दिदैं उहाँले प्रेस स्वतन्त्रताको पक्षमा प्रदेश सरकार प्रतिबद्ध रहेको बताउनुभयो । मुख्यमन्त्री राउतले पत्रकार र पत्रकारितालाई व्यवस्थित बनाउनका लागि प्रदेश सरकारले सक्दो सहयोग गर्ने प्रतिबद्धता व्यक्त गर्दै सङ्घीयतालाई कमजोर बनाउन पछिल्लो समय षडयन्त्र भइरहेको हुँदा यसलाई सुरक्षित गर्नु सवैको साझा दायित्व रहेको बताउनुभयो ।

कर्मचारीको अभाव र असहयोगका कारण प्रदेश सरकारले अपेक्षाकृत काम गर्न नसकेको स्वीकार्दै यस्तै अवस्था रहे लोकतन्त्र र सङ्घीयता नै धरापमा पर्नसक्ने खतरा रहेको उल्लेख गर्दै उहाँले अविलम्ब दक्ष कर्मचारी पठाउन सङ्घीय सरकारसँग आग्रह गर्नुभयो ।

प्रदेश नं २ सरकारका मुख्यन्यायाधिवक्ता दीपेन्द्र झाले प्रदेश सरकारले ल्याउन लागेको मिडिया विधेयकमा केही त्रुटि वा कमजोरी भए सञ्चारकर्मीसँग छलफल गरी टुङ्ग्याउने बताउँदै मिडिया विधेयकले पत्रकारितालाई व्यवस्थित र मर्यादित बनाउने दाबी गर्नुभयो ।

प्रदेश नं २ भरिमा २०७५ माघ १ गतेपछि जन्मिएका २० हजार छोरीहरुको बीमा गरेको, १४ हजार १४० छात्रालाई साइकल वितरण गरेको, सामाजिक रुपान्तरणका लागि हरेक क्षेत्रमा महिलालाई ५० प्रतिशत आरक्षण, दलित विधेयकजस्ता महत्वपूर्ण काम गरेर प्रदेश नं २ सरकारले छोटो समयमा हासिल गरेको सफलता ऐतिहासिक भएको उल्लेख गर्दै उहाँले प्रदेश सरकारको सकारात्मक काममा मिडियाले सहकार्य गर्नुपर्ने आवश्यकता औल्याउनुभयो ।

वरिष्ठ पत्रकार राजेश्वर नेपालीले राससमा काम गर्दाको क्षण महत्वपूर्ण रहेको अनुभव सुनाउँदै राससलाई अझै निष्पक्ष, तथ्यपरक मिडियाको रुपमा सबैले लिने गरेको बताउनुभयो । अर्का वरिष्ठ पत्रकार रामभरोस कापडीले बद्दो सामाजिक सञ्जालको प्रयोगसँगै कतिपय गलत समाचार सामाजिक सञ्जालमा प्रयोग भइरहको बताउँदै राससलगायतका सरकारी सञ्चारमाध्यमले अझै आफ्नो विश्वनीयतालाई कायम राखेको उल्लेख गर्नुभयो ।

नेपाल पत्रकार महासङ्घ धनुषाका पूर्वसभापति तथा प्रदेशसभाका सदस्य रामअशिष यादवले गणतन्त्रमा पत्रकार र पत्रकारिता अक्सिजनको रुपमा काम गरिरहेको बताउँदै अक्सिजनलाई नियन्त्रित गरेर गणतन्त्र सुरक्षित हुन नसक्ने भएकाले प्रेसलाई स्वतन्त्र बनाइराख्नुपर्नेमा जोड दिनुभयो ।

रासस प्रदेश नं २ कार्यालय जनकपुरका प्रमुख हिमांशु चौधरीको अध्यक्षतामा आयोजित कार्यक्रममा नेपाल पत्रकार महासङ्घ धनुषाका अध्यक्ष अनिल मिश्र, रासस वीरगञ्जका प्रमुख वीरेन्द्र कर्णले राससको इतिहास, भूमिका, योगदान, समस्या र चुनौतीका विषयमा प्रकाश पार्नुभयो ।

सो अवसरमा मुख्यमन्त्री राउतले राससको उत्कृष्ट स्थानीय समाचारदाता सञ्जीतकुमार मण्डललाई पुरस्कृत गर्नुको साथै राससको स्थापनाकालमा समाचारदाताको रुपमा योगदान पु¥याउने वरिष्ठ पत्रकार बृजकुमार यादवलाई दोसल्ला ओढाएर सम्मान गर्नुभयो ।

सेयर गर्नुहोस

योगदानकर्ता

+रासस

- विचार -

- लोकप्रिय -

- नछुटाउनुहोस -

- अन्य मिडिया -