नेपालमा लगानी गर्न आउनुस् : मन्त्री पुन

नेपालमा लगानी गर्न आउनुस् : मन्त्री पुन


 २७ पुस : ऊर्जा, जलस्रोत तथा सिँचाइमन्त्री वर्षमान पुनले नेपालमा जलविद्युत् क्षेत्रमा लगानी गर्न अन्तर्राष्ट्रिय समुदायलाई अपिल गर्नुभएको छ ।

युएइको अबुधाबीमा जारी अन्तर्राष्ट्रिय नवीकरणीय ऊर्जा सङ्घको १० औँ साधारणसभामा उहाँले नयाँ संविधान जारी भएसँगै नेपालमा राजनीतिक स्थायित्व कायम भएको तथा नेपाल कम्युनिष्ट पार्टी (नेकपा) नेतृत्वको सरकारले लगानीमैत्री वातावरण निर्माण गरेको बताउनुभयो ।

Advertisement

जलविद्युत् क्षेत्रमा लागानीमैत्री वातावरण निर्माण गर्न सरकारले कानूनी सुधार, क्षेत्रीय बजार विस्तार तथा विद्युत् नियमन आयोग स्थापनाजस्ता काम गरेको उहाँको भनाइ थियो । मन्त्री पुनले सार्वजनिक निजी साझेदारीमा जलविद्युत्मा लगानी प्रवद्र्धन गर्ने नेपाल सरकारको नीति रहेको चर्चा गर्दै ढुक्क भएर नेपालमा लगानी भित्र्याउन आग्रह गर्नुभयो ।

सरकारले १० वर्षमा १५ हजार मेगावाट विद्युत् उत्पादनको लक्ष्य राखेको भन्दै उहाँले आन्तरिक बजारमै विद्युत् खपतका लागि विभिन्न योजनासमेत अघि सारेको उल्लेख गर्नुभयो । उहाँले विद्युत् खपत बढाउन विशेष आर्थिक क्षेत्रमा कर छुट, विद्युतीय सवारी प्रवद्र्धन र चार्जिङ सेन्टर स्थापना गर्न लागिएको बताउनुभयो ।

सङ्घलाई नेपालमा लगानीका लागि सहयोग जुटाइदिन आग्रह गर्दै मन्त्री पुनले विद्युत् उत्पादन गर्न, प्रसारण लाइन निर्माण तथा वितरण गर्न सस्तो र प्रभावकारी प्रविधि स्थापनामा सघाउन अनुरोध गर्नुभयो । फरक प्रसङ्गमा मन्त्री पुनले जलवायु परिवर्तनका कारण हिउँ पग्लने क्रम बढेकामा चिन्ता प्रकट गर्दै ऊर्जा क्षेत्रको सुरक्षाका लागि त्यसलाई रोक्न गर्नुपर्ने काममा गम्भीर हुन सबैको ध्यानाकर्षण गराउनुभयो ।

करिब १२० मुलुकका मन्त्री सहभागी सभामा नेपालका तर्फबाट मन्त्री पुनको नेतृत्वमा प्रतिनिधिसभा सदस्य राधाकुमारी ज्ञवाली, राजबहादुर बुढा र भूमि त्रिपाठी तथा युएईका लागि नेपाली राजदूत कृष्णप्रसाद ढकाल, ऊर्जा मन्त्रालयका सहसचिव मधुप्रसाद भेटुवाल, बैकल्पिक ऊर्जा प्रवद्र्धन केन्द्रका कार्यकारी निर्देशक मधुसुदन अधिकारी र मन्त्री पुनका प्रमुख स्वकीय सचिव दुर्गाप्रसाद चापागाईं सहभागी हुनुहुन्छ ।

User Avatar
रासस
“परिवर्तका लागी स्वच्छ पत्रकारीता” THE TIMES OF NEPAL | (thetimesofnepal.com) मा अंग्रेजी, नेपाली दुवैमाध्यमबाट राष्ट्रिय तथा अन्तराष्ट्रिय समाचार पढ्न पाउनुको साथ साथै तपाईको स्थानिय स्तरमा भएका समाचारहरु हामिलाई पठाउन समेत सक्नुहुनेछ ।

तपाईको प्रतिक्रिया दिनुहोस्

प्रतिक्रिया दिने पहिलो व्यक्ति हुनुहोस् ।

जवाफ दिनुहोस

Your email address will not be published.

सम्बन्धित पोस्टहरू

भिडियो

छुट्यो कि?