प्रविधिको अधिकतम प्रयोगबाट विकासको मार्गमा जान सकिन्छ : मन्त्री बाँस्कोटा

प्रविधिको अधिकतम प्रयोगबाट विकासको मार्गमा जान सकिन्छ : मन्त्री बाँस्कोटा


सञ्चार तथा सूचना प्रविधिमन्त्री गोकुलप्रसाद बाँस्कोटा

२ पुस :सञ्चार तथा सूचना प्रविधिमन्त्री गोकुलप्रसाद बाँस्कोटाले सूचना प्रविधिको अधिकतम उपयोगबाट देशलाई विकासको मार्गमा अघि बढाउन सकिने बताउनुभएको छ ।

उहाँले राष्ट्रको सामाजिक–आर्थिक रुपान्तरणका लागि सूचना तथा सञ्चार प्रविधिको प्रवद्र्धन गर्न सरकार क्रियाशील रहेको उल्लेख गर्नुभयो । सञ्चार तथा सूचना प्रविधि मन्त्रालयले आज यहाँ आयोजना गरेको ‘डिजिटल नेपाल फ्रेमवर्क–२०७६’ भेलामा सरकारका प्रवक्ता बाँस्कोटाले सूचना तथा सञ्चार प्रविधि (आइसिटी) लाई नेपालको कृषि, स्वास्थ्य, शिक्षा, ऊर्जा, पर्यटन, वित्त र शहरी पूर्वाधारका क्षेत्रमा अधिक उपयोग गर्ने लक्ष्यका साथ ८० वटा कायक्रम कार्यान्वयन गर्ने योजनाका साथ सरकार अघि बढेको बताउनुभयो ।

Advertisement

दुनियाँमा ज्ञान र डिजिटल पहुँच भएका मानिसले बढी सम्पत्ति आर्जन गरेको दृष्टान्त प्रस्तुत गर्दै उहाँले आधुनिक युगमा प्रविधिको ठूलो महत्व र आवश्यकता भएकाले त्यसलाई प्रवद्र्धन गर्न आफू लागिपरेको बताउनुभयो । उहाँले भन्नुभयो, “मुलुकमा डिजिटल प्रविधिलाई अघि बढाउन मन्त्रालयले पाँच वर्षको योजना बनाएर कार्यान्वयनको तयारीमा अघि बढाएको छ ।”

सूचना प्रविधिका क्षेत्रमा काम गर्ने निजी क्षेत्रसँग सहकार्य गरेर सरकार अघि बढ्ने मन्त्री बाँस्कोटाले बताउनुभयो । उहाँले भन्नुभयो, “मुलुकमा ‘समृद्ध नेपाल, सुखी नेपाली’को सपना साकार पार्ने अर्थतन्त्रको एक परियोजनाका रुपमा डिजिटल प्रविधिलाई मन्त्रालयले लिएको छ ।” डिजिटल प्रविधिप्रति नयाँ पुस्ताको आकर्षण रहेको मन्त्री बाँस्कोटाले दाबी गर्नुभयो ।

सो क्षेत्रमा आवश्यक पूर्वाधार निर्माणका लागि निजी र सरकारी क्षेत्रलाई समेटेर एकीकृतरुपमा समन्वय गरेर अघि बढ्दा सजिलै उपलब्धी प्राप्त गर्न सकिने उहाँको भनाइ छ । मुलुकमा राजनीति अस्थिरता समाप्त भएर मुलुक आर्थिक क्रान्तिका रुपमा अघि बढेकाले विकास साझेदार संस्थालाई सरकारले खुलेर सहयोग गर्ने मन्त्री बाँस्कोटाले उल्लेख गर्नुभयो ।

राष्ट्रिय योजना आयोगका उपाध्यक्ष प्रा डा पुष्पराज कँडेलले नेपालको अर्थतन्त्रलाई हाँक्ने क्षेत्र सूचना प्रविधि क्षेत्र नै भएको विचार व्यक्त गर्नुभयो । उहाँले भन्नुभयो, “विकसित मुलुक कम्प्युटर अनि सूचना र प्रविधिका माध्यमबाट अघि बढेका हुन् । मुलुकमा यससम्बन्धी उपयुक्त र आवश्यक नीति बनाएर जाँदा अर्थतन्त्र विस्तार हुने उपाध्यक्ष कँडेलको दावी छ ।

सो मन्त्रालयका सहसचिव वीरेन्द्रकुमार मिश्रले मुलुकको ५० भन्दाबढी जिल्लामा फोर जी सेवा विस्तार भइसकेको जानकारी दिनुभयो । उहाँले भन्नुभयो, “देशमा डिजिटल प्रविधिका माध्यमबाट गरीबी, अशिक्षा, बेरोजगारको अन्त्य गर्नेछौँ ।” समाजमा नवीनतम् प्रविधिको प्रयोग गरेर मानिसको जीवन कार्य प्रणालीलाई गतिशील बनाउने, बहुउद्देशीय संस्थाको विकास गर्ने योजनामा अघि बढेको सहसचिव मिश्रले बताउनुभयो ।

User Avatar
रासस
“परिवर्तका लागी स्वच्छ पत्रकारीता” THE TIMES OF NEPAL | (thetimesofnepal.com) मा अंग्रेजी, नेपाली दुवैमाध्यमबाट राष्ट्रिय तथा अन्तराष्ट्रिय समाचार पढ्न पाउनुको साथ साथै तपाईको स्थानिय स्तरमा भएका समाचारहरु हामिलाई पठाउन समेत सक्नुहुनेछ ।

तपाईको प्रतिक्रिया दिनुहोस्

प्रतिक्रिया दिने पहिलो व्यक्ति हुनुहोस् ।

जवाफ दिनुहोस

Your email address will not be published.

सम्बन्धित पोस्टहरू

भिडियो

छुट्यो कि?