खानेपानी तथा सरसफाइमन्त्री बिना मगरले संविधानले प्रदत्त गरेको स्वच्छ खानेपानीको अधिकार प्रदान गर्न वर्षात्को पानी सङ्कलनले सहयोग पुग्ने बताउनुभएको छ ।
‘जीविकोपार्जन, समुदाय र परिस्थितीय चक्र लचकताको लागि वर्षाको पानीे सङ्कलन’ सम्बन्धी दुईदिने सम्मेलनको आज समापन गर्दै उहाँले दिगो विकासको लक्ष्य हासिल गर्न पानी सङ्कलन तथा व्यवस्थापनले सहयोग पुग्ने बताउनुभयो । मन्त्री मगरले नेपालका शहरी क्षेत्रको संरचना वर्षात्को पानी तर्काउने ढङ्गले निर्माण गरिएकाले पानी जमीनमा पुनःभरण हुन नपाएर स्रोतहरु सुक्ने तथा छोटो समय परेको पानीबाट समेत बाढी र पहिरोको समस्या देखिने बताउनुभयो । “पानी अभावका कारण महिनावारी हुँदा महिलालाई विभेद् हुने गरेको छ”, उहाँले भन्नुभयो ।
पूर्वमन्त्री गणेश साहले सम्मेलनले वर्षात्को पानी सङ्कलन र व्यवस्थापनबारे ज्ञान बढाएको बताउनुभयो । उहाँले नगरपालिकाका निर्वाचित प्रमुखको सहभागिताले पानीको सङ्कट भोग्दै आएका नगरपालिकाले सङ्कट टार्नका लागि वर्षात्को पानी घरघर र समुदायमा उपयोग गर्ने कार्यक्रम तर्जुमा गर्न सहयोग पुग्ने बताउनुभयो ।
‘स्मार्ट वास’का निर्देशक तथा प्रमुख कार्यकारी अधिकृत हरिप्रसाद शर्माले वर्षात्को पानी सङ्कलन र व्यवस्थापन कार्यमा सम्मेलनबाट सहयोग पुगेको बताउनुभयो । सम्मेलनमा ३० कार्यपत्र प्रस्तुत गरिएका थिए भने सात बुँदे सङ्कल्प प्रस्तावसमेत पारित भएको छ ।