जर्मनीबाट विकास सहायता निरन्तर प्रवाहको प्रतिबद्धता, नेपालसँगको सम्बन्धलाई उच्च महत्व जर्मनीबाट विकास सहायता निरन्तर प्रवाहको प्रतिबद्धता, नेपालसँगको सम्बन्धलाई उच्च महत्व



३३

–शरच्चन्द्र भण्डारी

काठमाडौँ, १ साउन : जर्मनीले नेपाललाई निरन्तर रुपमा विकास सहायता उपलब्ध गराउने प्रतिबद्धता व्यक्त गर्दै नेपालसँगको सम्बन्धलाई उच्च महत्व दिएको बताएको छ ।



साथै बर्लिनले वर्तमान सरकारले अघि सारेका आर्थिक सुधारका कार्यक्रमको सराहना मात्र गरेको छैन नेपालको विकासको पुरानो साझेदार उसले दश वर्ष लामो द्वन्द्व स्वयम् समाधान गर्न सफल नेपालले त्यस समयका बाँकी विषयलाई पनि शीघ्र निरुपण गर्ने विश्वास व्यक्त गरेको छ ।

नेपालको दुई दिवसीय औपचारिक भ्रमणमा रहनुभएका जर्मनीको परराष्ट्र मन्त्रालयमा दक्षिण एशिया मामिला हेर्ने आयुक्त मार्कुस पोटजेलले नेपालको संविधानको मर्म र भावनानुसार आधारभूत मानवाधिकार सुनिश्चित गर्न भएका प्रयासको प्रशंसा पनि गर्नुभएको छ ।

तीनवटै तहको निर्वाचन सम्पन्न भई राजनीतिक स्थायित्वका साथ सङ्घीय लोकतान्त्रिक शासनप्रणाली अङ्गालेको नेपालसँग उच्चस्तरीय राजनीतिक परामर्श गर्नु वाञ्छनीय भएकाले वार्षिक रुपमा द्विपक्षीय भेटवार्ता गर्दै आपसी सम्बन्धलाई अझ प्रगाढ बनाउन कूटनीतिक संयन्त्र परिचालन भएको उहाँ बताउनुहुन्छ ।

नेपालसँगको राजनीतिक संवाद र सम्बन्धलाई स्तरोन्नति गर्ने बर्लिनको चाहनाअनुरूप नेपालको दुई दिवसीय भ्रमणमा रहनुभएका उहाँले भारततर्फ प्रस्थान गर्नुअघि कूटनीतिक मामिलामा कलम चलाउने केही पत्रकारमाझ ‘पुरानो मैत्री र साझेदारीपूर्ण सहयोगात्मक सम्बन्धलाई नयाँ उचाइ दिन चाहेको’ बताउनुभयो ।

नेपाल र जर्मनीले जलवायु परिवर्तनका प्रतिकूल असरहरु घटाउन तथा हरितगृह ग्यास उत्सजर्नको मात्रालाई पनि बढोत्तरी हुन नदिने समान दृष्टिकोण र अडानका साथ अन्तर्राष्ट्रिय मञ्चहरूमा साझेदारी एवं सहकार्य गर्दै आएको छ ।

हेम्बर्ग विश्वविद्यालयसँगको साझेदारीमा केशर महलस्थित पुस्तकालय र राष्ट्रिय अभिलेखालयका संस्कृत पाण्डुलिपीहरूको संरक्षण, अबका पाँच महीनापछि प्रारम्भ हुने नेपाल भ्रमण वर्षलाई सफल तुल्याउन जर्मनीका पर्यटन उद्यमी–व्यवसायीलाई नेपाल घुम्न अभिप्रेरित गर्ने प्रतिबद्धतासमेत जर्मनीले व्यक्त गरेको छ ।

गत वर्ष ३७ हजार जर्मनीले पर्यटकले नेपाल भ्रमण गरेका र काठमाडौँमा अन्तर्राष्ट्रियस्तरका भौतिक पूर्वाधार निर्माण भइरहेका सन्दर्भमा नेपालको पर्यटन प्रवद्र्धनमा सघाउन जर्मनीलाई कठिन नहुने आयुक्त पोटजेलको कथनले नेपालका पर्यटन व्यवसायीमा उत्साहको सञ्चार भएको छ ।

म्युनिख र गौतमबुद्ध अन्तर्राष्ट्रिय विमानस्थलबीच साझेदारी, जर्मनीको राष्ट्रिय ध्वजाबाहक लुफ्थान्साको पुनरागमन, जर्मनीको कुनै एउटा प्रतिष्ठित सुरक्षण मुद्रण कम्पनीको सम्भावित नेपाल प्रवेशजस्ता धेरै सकारात्मक प्रगतिका विवरण सुनाउने सन्दर्भमा उहाँ नेपालको मानवअधिकार, प्रेस स्वतन्त्रता, शान्ति र विकासको पक्षमा जर्मनी सधैँ रहेको दोहो¥याउन चुक्नु भएन ।

 

सत्य निरुपण तथा मेलमिलाप आयोग, बेपत्ता पारिएका व्यक्तिको छानबिन आयोगमा पदाधिकारीको नियुक्त, आयोगका बाँकी न्याय सम्पादनका बाँकी कामले शीघ्र पूर्णता पाउनेमा जर्मनी ढुक्क रहेको उहाँको कथनले जर्मनी नेपालको विकासको वास्तविक साझेदार हो भन्ने पुष्टि गर्छ

नेपालको सामाजिक–आर्थिक उन्नयनका निम्ति छ दशकदेखि सघाउँदै आएको जर्मनीले नेपाललाई अनुदानका रुपमा विकास सहायतामात्र नभइ रोजगारीका अवसर सिर्जना गर्दै आर्थिक समृद्धिको मार्गमा अग्रसर हुन सहयोग गर्दै आएको छ । र, त्यसलाई निरन्तरता दिने वाचा गरेको छ ।

घुमाउरो पाराले चीन र भारतसँगको सन्तुलित सम्बन्धबाट नै नेपालको समृद्धि र विकासतर्फको यात्रा सफल हुने आशय व्यक्त गर्दै आयुक्त पोटजेल प्रत्यक्ष विदेशी लगानी आकर्षण गर्ने नेपाल सरकारको नीतिको आलोचन गर्न चुक्नु भएन । उहाँले आफ्नै देशमा फस्टाएका साना तथा मझौला उद्योग र तिनले जर्मनीको अर्थतन्त्रमा गरेको योगदानको दृष्टान्त प्रस्तुत गर्दै पाँचलाख अमेरिकी डलरभन्दा कमको वैदेशिक लगानी स्वीकार नगर्ने नीति परिमार्जनयोग्य रहेको बताउनुभयो । “प्रशासनिक ढिलासुस्तीको अन्त्यले पनि लगानीकर्तालाई उत्साहित गर्छ,” उहाँ भन्नुहुन्छ ।

पाकिस्तान र अफगानीस्तानको भ्रमण सकेर नेपाल आउनुभएका उहाँ नेपालसँग क्षेत्रीय तथा अन्तर्राष्ट्रिय चासोका विषयमा विचारविमर्श अपरिहार्य भएको ठान्नुहुन्छ । दुई देशका परराष्ट्र मन्त्रालयका उच्च अधिकारीबीच राजनीतिक परामर्श प्रारम्भ हुनु त्यसैको निरन्तरता भएको उहाँ मान्नुहुन्छ । सङ्घीयता अङ्गालेको आफ्नो देश र भर्खरै त्यस्तै शासन प्रणालीमा प्रवेश गरेको नेपालसँग अनुभव आदानप्रदान गर्नु भ्रमणको अर्को उद्देश्य हो भन्न उहाँ पछि पर्नुभएन ।

द्वन्द्वकालीन मुद्दा शीघ्र टुङ्गिनेमा जर्मनी आश्वस्त

काठमाडौँ, १ साउन : सङ्घीय गणतन्त्र जर्मनीका एक उच्च कूटनीतिक अधिकारीले द्वन्द्वकालीन मुद्दा शीघ्र टुङ्गिनेमा आफ्नो देश आश्वस्त रहेको बताउनुभएको छ ।

जर्मनीको परराष्ट्र मन्त्रालयका दक्षिण एशिया मामिला आयुक्त मार्कुस पोटजेलले कानून, न्याय तथा संसदीय मामिलामन्त्री भानुभक्त ढकालसँग भएको शिष्टाचार भेटमा द्वन्द्वकालका सबै समस्या समाधान गर्न सरकारले आवश्यक कानून तर्जुमा गरेको र ती संसदीय प्रक्रियामा रहेको जानकारी दिनुभयो ।

नेपालको दुई दिवसीय भ्रमण पूरा गरी आज अपराह्न भारततर्फ प्रस्थान गर्नुअघि जर्मनीको राजदूतावासमा केही पत्रकारसँग कुरा गर्दै उहाँले नेपालको संविधानको मर्म र भावनानुसार आधारभूत मानवाधिकार सुनिश्चित गर्न भएका प्रयासको प्रशंसा गर्नुभयो ।

सत्य निरुपण तथा मेलमिलाप आयोग, बेपत्ता पारिएका व्यक्तिको छानबिन आयोगमा पदाधिकारीको नियुक्त, आयोगका बाँकी न्याय सम्पादनका बाँकी कामले शीघ्र पूर्णता पाउनेमा जर्मनी ढुक्क रहेको उहाँले बताउनुभयो ।


User Avatar
द टाइम्स अफ नेपाल
“परिवर्तका लागी स्वच्छ पत्रकारीता” THE TIMES OF NEPAL | (thetimesofnepal.com) (नेपाल सरकार,सूचना तथा सञ्चार मन्त्रालय, सूचना तथा प्रसारण विभाग दर्ता नं. ६०/०७३–०७)मा दर्ता भई सञ्चालित अनलाइन न्युज पोर्टल हो । जसमा अंग्रेजी, नेपाली दुवैमाध्यमबाट राष्ट्रिय तथा अन्तराष्ट्रिय समाचार पढ्न पाउनुको साथ साथै तपाईको स्थानिय स्तरमा भएका समाचारहरु हामिलाई पठाउन समेत सक्नुहुनेछ ।

प्रतिक्रिया

सम्बन्धित पोस्टहरू

विचार/ब्लग

भिडियो

छुट्यो कि