धनगढी, १२ असार : प्रदेश ७ को प्रदेशसभाको आज अपराह्न ४ बजे बस्ने भनिएको बैठक सूचना टाँस गरेर स्थगन गरिएको छ ।
आगामी आवको बजेटका सम्बन्धमा प्रतिपक्षी दलका सदस्यको असन्तुष्टिका बारेमा प्रदेश सरकारले छलफल गरिरहेकाले आजको बैठक स्थगन गरिएको जनाइएको छ । प्रतिपक्षी दलका सदस्यले प्रदेश सरकारले आव २०७५÷७६ का लागि ल्याएको बजेट विनियोजनको प्रकृतिप्रति असन्तुष्टि जनाउँदै प्रदेशसभाको सोमबारको बैठक पनि छलफलमा प्रवेश नै नगरी स्थगन गरिएको थियो ।
प्रदेश सभाको अर्को बैठक बुधबार अपराह्न ४ बजे बस्ने कार्यक्रम छ ।
यसैबीच प्रमुख विपक्षी नेपाली काँग्रेस संसदीय दलका नेता डा रणबहादुर रावलले बजेटमा देखिएका असन्तुष्टि हटाउनेबारे सरकारसँग आज गरिएको छलफलपछि प्रतिपक्षका आवाजलाई सम्बोधन गरिने विश्वास आफूहरुलाई लागेको बताउनुभयो ।रासस